Un wega cu tabata di vital importancia pa Estrella cu tabata luchando na e oranan ey ainda pa su clasificacion cu e ekipo di Dakota, pero e dia siguiente e naranhadanan a logra nan clasificacion ora cu Dakota a empata cu Deportivo Nacional.

  E empate a duna Bubali un total di 34 punto cu sin duda ta un cantidad impresionante mirando cu e ekipo ultimo temporadanan, no a logra na supera e total di 20 punto, tambe a permiti Bubali sigura e di tres puesto ya cu Estrella a keda cu 30 punto y cu solamente un fecha mas pa wordo hunga, e di tres puesto ta sigura pa e orguyonan di Noord.

  Sin duda algun e ekipo di Noord ta bibando momentonan grandi, hasta impresionante ya cu den di dos buelta di e actual campeonato, Bubali a perde varios di su hungadonan estelar, sea pa lesion serio, lesion leve y suspension pa acumulacion di carchi geel, sin embargo e ekipo a sigui lucha y a logra acumula 14 punto faltando un wega ainda contra di RCA cu lo wordo hunga Diadomingo venidero.

  Un di e handicapnan mas grandi cu Bubali a confronta den di dos buelta tabata e lesion di Maurice Escalona kende mester a ser someti na un operacion na su rudia y kende no a mira accion mas y ta recuperando y preparando pa e serie di play off.

Hunto cu Maurice su ruman Daniel ‘Danzo’ Escalona tambe no a mira mucho accion debi na un lesion na su pia drechi y tambe ta recuperando y tratando di keda cla pa e play off.

  Fuera di e dos rumannan, e ekipo na varios ocasion a hunga sin otro estelarnan manera Antonio Lopez, Rigmar Lodowica mientras cu otro hungado clave, Ericson Tromp inicialmente tabata afo cu suspension pero despues a lesiona su rudia di cual ainda e no a recupera totalmente for di dje.

  Fuera di e hungadonan aki, Bubali a perde otro velos delantero ora cu Daryl Nelson a cuminsa traha y no por a sigui hunga futbol manera el a haci pa ultimo añanan.

  Otro hungado cu e ekipo no por a sigui conta riba dje tabata e defensa central Urvin Albertsz kende pa motibo familiar mester a stop di hunga futbol pa atende cu esaki lagando e ekipo c’un scarcedad grandi di hungadonan di defensa y sigur ora cu otro defensor mas, esta Gerald Leest, tampoco tabata disponibel mas.

  Pues casi ocho hungador cu e ekipo di Bubali a perde durante di e actual campeonato pero e ekipo a sigui lucha y logra clasifica na di tres puesto di e campeonato regular.

PREPARACION

  Diadomingo ultimo e ekipo a inicia cu su etapa di preparacion pa e serie di play off y ta continua den e direccion aki ora cu e ekipo lo trata di duna e bario di Bubali, su di dos titulo di campeon den su historia.

  E ultimo y unico titulo cu SC Bubali a logra te cu awor ta data for di 40 aña pasa ora cu e ekipo a bira campeon di Aruba y sin duda e animo y deseo ta grandi pa logra di ripiti e hazaña aki un biaha mas.

  Bubali ta conta c’un fanaticada fiel cu ta bin no solamente for di e bario di Noord pero for di tur parti di e isla y su tradicion ta bon conoci pa tur hende.

  E utlimo compromiso di Bubali pa e serie regular di e campeonato 2014-2015 ta Diadomingo venidero pa 6’or di atardi ora cu e ekipo enfrenta e puntero di e campeonato, esta e tricolornan di Solito, RCA.