Diasabra 13 Juni, Speedworx Cycling Team y KIA Motors hunto cu Tri-Bike Aruba a tene e di dos sesion di Kids Bike Jams na Safir, Noord.

  “Nos ta dedica tempo na Kids Bike Jams paso nos tin passion pa ciclismo infantil. E obhetivo ta pa extende un disiplina asina bunita siendo un alternativa pa complimenta e formacion integral di e mucha”, ta palabranan di e organisadornan di Kids Bike Jams cu a cuminsa tres ana pasa cu e idea di duna les di ciclismo conhunto cu evento di competencia exclusivamente pa mucha.  “E satisfaccion di mas grandi ta pa mira varios mucha cu a cuminsa den e temporada cu a start cu Kids Bike Jams cu awe ta competi na e nivel di e federacion di ciclismo”.

  Speedworx Cycling Team y Tri-Bike Aruba ta promotornan activo y ta e organisadornan di Kids Bike Jams hunto cu Kia Motors como e patrocinador principal.  Na cada evento di Kids Bike Jams, e organisadornan ta e promernan cu ta yega y e ultimo cu ta bandona e sitio.  Asina a sosode diasabra ultimo ora cu a tene e di dos sesion di Kids Bike Jams den e bario di Safir.

  Danki na e participacion activo di e mayornan di e ciclistanan y voluntario di e teamnan y esnan di bon boluntad cu ta colabora cu e intencion pa no para e chikitinan den nan actividad.  

  Un gradicimento especial na tur e sponsornan cu ta colabora pa trece dilanti e evento di Kids Bike Jams pa e muchanan por sigui core nan bicicleta.

  Pa sigui motiva e muchanan ta haci entrega di un certificado di participacion y goodie-bag cu treats.  E gratificacion di mas grandi pa e organisadornan ta pa mira varios cara nobo cu ta wordo agrega na e lista di participante y alaves caranan contento cu ta bolbe felis bek na nan cas.

  E resultado di e di dos session di Kids Bike Jams na Safir ta sigui aki:

Cat. 1 Boys: Chiel Hartog

Cat. 2 Boys: Christian Jansen

Cat. 2 Girls: Sophie Dings

Cat. 3 Boys: Justin Morales

Cat. 3 Girls: Ryandra Kamperveen

Cat. 4 Boys: Daaf Plomp

Cat. 4 Girls: Silvienne Gonzalez

Cat. 5 Boys: Ian Hekman

Cat. 5 Girls: Zayra Felix

  E mensahe di Kids Bike Jams cual ta cu e muchanan ta disfruta ariba di un bicicleta, lo keda revela cu tempo na e mayornan cu ta apoya e muchanan hibando nan na cada evento pa nan sinti nan mes motiva y acompaña.  Cu e esfuerso di e teamnan y e mayornan e muchanan ta sigui den preparacion pa participa na e ultimo evento di Kids Bike Jams, cu ta e gran finale dia 27 di Juni 2015 cuminsando pa 7:30 a.m na Drive-Inn.