Logrando algun bon resultado den e rondanan preliminar como tambe den e gran final unda e la sali na di seis luga, e coredo di BMX, Zaythiel Soekandar ta sinti cu awor aki e ta mucho mas mihor prepara pa e Weganan Panamericano.  Cada biaha e haya e oportunidad di representa Aruba den un evento grandi e ta gana mas experiencia y cada biaha su resultadonan ta satisfactorio. 

  Cu su apenas 4 aña di edad, e hoben Zaythiel Soekandar a cuminsa core bike cross. No tabata por otro, mirando cu su tata Audi tabata un di e miho nan na Aruba den e deporte aki.  Mas cu claro Zaythiel como tambe su ruman Zyqion kier sigui e pasonan di nan tata.  Na un edad hoben ya caba Zaythiel a participa na diferente competencia nan grandi di nivel mundial y aki ya caba por a constata cu e tin un talento unico y den futuro e lo por a bira un di e mihornan.  Su estatura y e fisico fuerte forma ta caracteristicanan cu ta cuadra cu un coredor di bike cross. 

  Pa Zaythiel su preparacion a bay super bon.  E la participa na algun competencia na Merca unda a obtene bon resultado cual e la yega den e final.  E ta masha contento di por a haya e oportunidad un bes mas pa defende e bandera di Aruba.  E sa cu cosnan no lo bay ta facil.  Den e Weganan Panamericano lo participa e campeon mundial y dos medayista Olimpico, pero manera Zaythiel ta bisa cu den bike cross tur cos ta posibel, e deporte ta un di hopi riesgo.  No obstante di tur esakinan Zaythiel lo haci su maximo esfuerso pa logra un tremendo resultado pa Aruba.

  Despues di e Weganan Panamericano e lo concentra riba clasificacion pa e Weganan Olimpico di Rio 2016.  E lo mester core varios careda di clasificatorio pa e por logra esaki.  Su soño ta pa yega dicho weganan y e ta sinti cu e lo por haci esaki sin mas.  E tin hopi aña den e deporte aki y ta mira un progreso enorme. Manera e ta bisa; "Bo mester tin hopi disciplina y tambe willing pa sacrifica tur cos pa logra bo soño.  Traha duro y tur cos lo por bira un realidad.  Dream Big.”