Cada luna, e federacion di tennis di mesa, esta ATTA ta tene su competencia di ranking den tur categoria.

E bataya semper ta fuerte mirando cu tur hungado ta bringa duro pa ta e number uno den nan respectivo categoria y claro pa ATTA esaki ta importante pa mira con cada hungado ta posiciona su mes tur luna, un muestra cu si di berdad tin progreso den cada un di nan. E categorianan den cual ta ser hunga ta U-13, U-18, B-klas y A-klas.

Pa loke ta e ranking den luna di juni, nos ta haya cu den e categoria U-13, e hoben Jeandry Mathilda a logra e prome luga, sigui di  cerca pa Ching Ho Chung y na di tres luga Johnatan Parades. Den e categoria U-18, e prome luga a bay pa Zhao Xie sigui na di dos luga pa Micheal Kelly y nas di tres luga Jean Pierre Helmeyer.  Den e categoria B-klas, e sopresa tabata grandi ora cu e hoben Johnatan Parades a resulta e ganado mientras su tras a termina na di dos luga e hoben Chingho Chung y na di tres luga a keda Lifrendy Lampe.

Por ultimo den e categoria mas halto esta A-klas, nos ta haya un Mario Lobo dominante unda e ta logra gana e prome luga sigui pa Zhao Xie y na di tres luga Franklin Lopes. E deporte di ping pong sigur tin un bon futuro su dilanti y no tin duda cu den futuro cercano nos lo tende mucho mas di nos atletanan di tennis di mesa.

Un danki sigur na Lotto, e Loteria di Aruba pa medio di Comision di Subsidio cu a subsidia e competencia di ranking di Aruba Table Tennis Association.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.