Delegacion di Corsou y Boneiro den e deporte di volleyball y futbol mucha muher a enfrenta e teamnan di Aruba.  IBiSA ta mira”tras un fin di siman exitoso cu resultadonan positivo pa e schoolnan di Aruba.

  E prome wega di volleyball a tuma lugar diabierna atardi riba cancha di Compleho Deportivo Frans Figaroa na Noord y tabata entre e team Aruba 1, Colegio San Nicolaas contra di International School Curacao.  E hobennan di Aruba tabata fuerte y sigur di nan mes riba cancha, mientras cu esnan di Corsou a duna lo maximo di nan banda.  Pero e prome set Aruba 1 a gana cu e score comodo di 25 pa 14.  Den e di dos set e hobennan di Corsou a reacciona barbaramente y tabata wanta e score hopi cerca.  E wega a desaroya yen di emocion y cu tremendo hugada di ambos banda.  Aruba 1 a logra gana e di dos set tambe cu e score preta di 25 pa 23.  E hobennan di Colegio San Nicolaas, team Aruba 1 a gana nan prome 2 punto di e “Weganan Interinsular”.

  Diasabra mainta trempan e weganan a sigui.  E prome dos team pa subi cancha tabata Aruba 1, Colegio San Nicolaas y Aruba 2, Colegio San Antonio.  E wega a desaroya bastante rapido y team Aruba 1 ta keda cu e racha positivo, ganando su wega den dos set sigui, ambos cu e score di 25 pa 18.  E hobennan di Colegio San Antonio a hunga un bunita wega, pero Colegio San Nicolaas a demostra un biaha mas pakico nan ta e team campeon di Aruba.

  Di biaha a continua cu e di dos wega di dia, y aki e hobennan di Scholen Gemeenschap di Boneiro a subi cancha pa midi forsa contra esnan di International School of Curacao.  Na inicio di e prome set e hobennan di Corsou a coy bentaha rapido y ta gana facil cu anotacion di 25 punto contra 17 di Boneiro, pero den e di dos set e hobennan di Boneiro a reacciona decidido y a sorprende e team di Corsou ganando cu e score di 25 pa 21.  Un di tres set a wordo hunga pa mira cua di e teamnan ta bira ganador.  Aki ta unda cu ambos team a bataya fuerte te na ultimo y no por a anticipa cua team ta bira ganador.  Finalmente Corsou a logra gana cu e score di 16 pa 14 y a gana e wega 2 set contra 1 di Boneiro.

  E weganan a sigui y e team di International School of Curacao a bolbe hunga, e biaha aki contra di e team Aruba 2.

  Despues di algun minuut di descanso, e hobennan di Corsou a cuminsa fuerte contra Aruba 2, Colegio San Antonio.  Team Aruba 2 a sorprende e hobennan di Corsou den e prome set y a gana cu score di 25 pa 21.  Corsou mesora a reacciona den e di dos set y a logra un diferencia grandi den punto cu na final a duna nan e set gana cu score di 25 punto contra 18 di Aruba 2.  Un biaha mas mester a hunga un di tres set definitive, aki e team di Aruba 2 a bataya su puntonan cu hopi forsa y a logra gana cu score di 15 pa 11 y a gana asina e team di International School of Curacao, 2 set contra 1.

  Despues di e weganan aki a tene un pausa pa e hobennan por a come y pa 2”or di merdia a continua cu e schedule di wega.  E wega cu a sigui tabata entre team Aruba 1, Colegio San Nicolaas y Scholengemeenschap Boneiro.  Aruba 1, cu tur su weganan gana te na e momento ey, tabata sigur y fuerte.  Den e prome set, e hobennan a demostra nan superioridad y a gana convincente cu score di 25-21.  Boneiro a sali duro den e di dos set y a duna e hobennan di Aruba 1 dolor di cabez.  E hobennan di Scholengemeenschap Boneiro a coy un racha pisa di punto tras di otro pa asina logra gana e di dos set.  Tension y emocion a subi y por a sinti esaki riba cancha.  E set decidido a cuminsa y team Aruba 1 a sali fuerte y sigur di nan mes pa bay cu e victoria y mantene nan invicto, pero principalmente pa gana tambe e “Weganan Interinsular” y keda cu e titulo di campeon.  Esaki finalmente a resulta tambe y cu hopi emocion e ultimo punto a keda logra.  E set ta finalisa 15 pa 8.  Aruba 1 a gana e wega 2 set contra 1.

  E ultimo wega di dia a bay entre Scholengemeenschap di Boneiro y team Aruba 2, e wega aki a resulta den un wega decidido pa mira ken ta bira ganador di e di dos y di tres lugar.  E hobennan di Boneiro apesar di a caba di hunga un wega di tres set, a sali fuerte y sigur pa gana y den un wega toch basta rapido a logra pasa riba team Aruba 2, Colegio San Antonio den dos set sigui cu scorenan di 25 pa 16 y 25 pa 15.

Premiacion di Volleyball:

  Mes atardi a entrega medaya y trofeo na e respectivo ganadornan.  Na di tres lugar a finalisa International School of Curacao.  Na di dos lugar a keda Scholengemeenschap di Boneiro y campeon di Volleyball Weganan Interinsular 2014 a bira team Aruba 1, Colegio San Nicolaas, cu a ripiti hazaña di aña anterior.  Contento e hobennan y nan coach a celebra e victoria.  E hungador mas valioso a ricibi un bunita trofeo y e premiacion aki a bay pa e hungado di Scholengemeenschap di Boneiro Lisandra Domacasse.

  IBiSA ta felicita e schoolnan cu a representa nan isla den e “Weganan Interinsular”, specialmente na e ganadornan y na Colegio San Nicolaas pa e tremendo prestacion pa defende nan titulo di campeon y logra esaki pa di dos aña consecutivo.