Kiri Thode y tambe Sarah Quita Offringa ta ganado nan di e prome dia di competencia.

For di nos hermana isla Bonaire nos a ricibi e siguiente comunicado:  E evento mundial tan spera a cuminsa diabierna dia 20 di juni cu registracion oficial di e participantenan sigui pa un dia bastante relahante debi na e condicion di biento.  Tur e participantenan a bin di diferente pais rond mundo cu a tuma oranan largo pa por a yega Bonaire. E participantenan a bin for di Alemania, Aruba, Belgica, Bonaire, Canada, Francia, Inglatera, Israel, Italia, Japon, Corsou, Noruega, Austria, Australia, Rusia, Suisa, Venezuela y Hulanda.

Den oranan di anochi hunto cu invitadonan special manera e sponsornan, participantenan, e team di PWA, e team di e comite di evento hunto cu cordinador general Gerrald Victorina y tambe e maestro di ceremonia señor Papi Cicilia, a oficialisa e comienso di e evento.  E cordinador general Sr. Gerrald Victorina a gradici tur e sponsornan cu semper a sa di demostra nan confiansa y aporte na engrandese e evento mundial di windsurf y a invita representatnte di gobierno hunto cu señor Ethsel Pieterrnella, Director di Ofisina di Turismo pa oficialisa e evento cu e sonido di pito.  E anochi a sigui cu e tremendo ambiente di Bolas Criollas y tambe e banda Kariño.

E prome dia di competencia a cuminsa cu e “skippers meeting” pa 10’or di mainta sigui pa e prome eliminacionnan.  E resultado pa e prome dia di competencianan di PWA Bonaire World Cup 2014 den categoria di Freestyle Men a keda na prome lugar Kiri Thode (NB-61) di Bonaire, segundo lugar Steven van Broeckhoven (B-72) di Belgica, di tercer lugar Tonky Frans (NB-7) di Bonaire y di cuater lugar Youp Schmit (NB-12) tambe di Bonaire.  E resultadonan pa e prome dia di competencia den categoria di Freestyle Women a keda na prome lugar Sarah Quita Offringa (ARU-91) di Aruba, na segundo lugar Arrianne Aukes (NED-131) di Hulanda, na tercer lugar Yolanda Brednt de Freites (V-26) di Venezuela y na di cuater lugar Oda Brodholt (NOR-500) di Noruega.

Organisadornan ta duna un danki inmenso na tur e sponsornan cu un biaha mas a mustra nan confiansa y aporte na engrandese e evento.  Por bishita e website di PWA www.pwaworldtour.com pa por mira e competensianan bibo y directo.