Un atleta cu sigur a conoce un desaroyo den forma impactante ta Mack van Eerenbeemt, un hoben cu ta practica e deporte di windsurfing (vela) y ya caba a sa na briya den varios competencia den exterior.

E atleta van Eerenbeemt a cuminsa prepara 10 luna pasa pa e Weganan Olimpico Hubenil, specificamente den e asina yama Techno 293, unda cu e ‘board’(plank) cu e atleta ta para riba dje ta otro cu esun di windsurf, mas facil pa maneha y un pista di mastil ahustabel. Durante di e competencia tur atleta mester usa e mesun material, e Techno 293 ta distinto cu e slalom cu nos conoce, sin embargo e diferencia na final ta keda dicidi pa e competidornan cu tin un mihor tecnica, strategia y tactica. 

E atleta Mack van Eerenbeemt a cuminsa cu e deporte di windsurf dos aña pasa y algun luna atras a wordo introduci na e Techno 293. Mes ora, hunto cu shete otro atleta mas, ela inicia cu e diferente entrenamentonan unda ta dedica tres dia pa siman y tambe eherce algun competencia mirando cu esaki ta esun di mas importante paso eyden bo ta siña tur cos. Na Aruba ta organisa varios competencia no oficial, pero bo ta keda den e ritmo di competencia. A pasa durante di e Weganan Suramericano Hubenil na Peru, Mack a haci un tremendo papel pa Aruba durante cinco dia largo, unda ela conkista e di tres lugar, bon pa un medaya di brons pa Aruba. Segun van Eerenbeemt, e atletanan di otro pais ta mas hopi cu Aruba, esey ta duna nan e bentaha. Aunke cu e atletanan di Suramerica ta bon den e deporte, tog esnan di Europa ta mucho mas mihor, e atletanan ta mucho mas dedica y cu hopi disciplina. Nan ta entrena a base di un plan y schedule mucho mas estricto.

Durante e competencia di clasificacion pa e Weganan Olimpico Hubenil, Mack hunto cu dos otro compañero a logra termina na di dos lugar overall den e "North American Windsurfing Championship 2014" cu a tuma lugar na Cancun, Mexico. Hasta den e campeonato di Europa, Mack a logra un bon resultado unda ela termina na di 14 lugar overall.

Pa loke ta su entrenamento na Hulanda, Mack ta conta nos cu e ta spera cu lo no tin hopi biento mirando cu asina nan por entrena mihor, pasobra na Nanjing no tin biento mes, pues esaki por duna mucho mas rendimento. Mack ta spera cu na Nanjing e lo por haci un bon papel, e atmosfera lo bai ta uno tremendo. Pa Mack e Weganan Olimpico Hubenil di Nanjing lo ta e prome stap, pero e mes kier yega un dia na Weganan Olimpico, sea ta Rio de Janeiro 2016 of Tokyo 2020 y e lo sigui traha duro pa realisa su soño.