Digicel Aruba ta ofrece su sosten na nos atletanan special y ta mustra su apoyo continuo y incondicional na e hobennan aki cu ta haci nan maximo esfuerso pa participa den e competencianan aki.

  Bob Sprengers, Gerente General di Digicel Aruba a haci e tremendo anuncio aki durante un conferencia di prensa unda el a confirma cu Digicel, manera semper lo sostene nos atletanan y cu esaki ta algo cu nan lo sigui haci incondicionalmente.

  Ta bon pa subraya cu Special Olympics ta e prome organisacion cu a conta cu un sponsorship di Digicel Aruba, hasta desde prome cu e compania a lansa su servicionan den forma oficial riba nos isla! Pues pa mas di 10 aña caba Digicel ta un di e sponsornan principal di Special Olympics.

  Pa e aña aki ta bay tuma luga diferente evento cuminsando na September y culminando na luna di December.  Por menciona cu lo tin entre otro, un tayer pa coachnan y un asina yama EKS (Eunice Kenney Schrivers) Day den luna di September.  Den October lo continua cu e training pa coach mientras cu di dia 30 di October te dia 2 di November lo tuma lugar e weganan nacional.

  Banda di esaki e trainingnan di e diferente disciplina di deporte di nos atletanan special ta bay inicia, manera ta Bocce, Badminton, Bowling, Atletiek, Landamento, Pingpong y Futbol. 

  A probecha e ocasion di e conferencia di prensa pa Digicel Aruba, a renoba nan compromiso di sponsor Special Olympics Aruba pa un aña mas.  E compromiso aki ta encera mucho mas cu djis e sosten financiero.  Digicel Aruba ta considera e organisacion di nos atletanan special como un “partner” y ta haci hopi evento hunto, empleadonan ta yuda e organisacion den nan oranan liber y asina por sigui menciona, pues, Special Olympics ta un famia di Digicel Aruba, pa hopi aña caba!

  E proceso pa registra e atletanan pa e Weganan Mundial di otro aña, na 2015 na Los Angeles, a cuminsa caba.  Digicel ta aportando den e parti aki tambe, dor di organisa fundraising hunto cu Special Olympics pa yega por alcansa e presupuesto desea, di 150 mil Florin pa cubri e gastonan pa hiba e atletanan Merca.  Claro cu e sosten adicional aki ta bin banda di e subsidio anual cu Digicel ta aporta cune na e fundacion.

"Special Olympics National Games 2014" lo bira un evento di kita sombre. Durante tur actividad, e empleadonan di Digicel lo t’ey presente como boluntario pa asina sostene nos atletanan.

  Digicel y Special Olympics Aruba ta invita comunidad henter pa disfruta di tur e eventonan deportivo y pa apoya nos atletanan!