Desde inicio di JDC/JFC na 1985, caminda Aruba a yega di participa varios biaha, esaki ta e promer biaha cu Aruba ta logra di bay cu e titulo máximo. E quipo, consistiendo di Patrick Sydow, Kyle Fränkel y Kevin Yarzagaray tin un trajectoria exitoso cu a cuminsa na 2013 caminda e mesun equipo aki a yega e Finals di e Junior Tennis Competition (JTC), cual ta un competencia di tennis similar cu e JDC, pero pa tenista nan te cu 14 aña di edad. Na 2013 e tensitanan a yega e Finals di JTC, caminda Aruba a titula Sup-Campeon. Na 2014 e mesun un equipo di tenistanan aki a hunga e JDC pa promer biaha, caminda Aruba a yega Semi-Finals, pero no ta logra avansa pa e Finals. Akinan nan a hunga contro di Republica Dominicana pa e di 3 puesto. Aruba a termina na aña 2014 na di tercer lugar, venciendo Republica Dominicana. E aña aki, esta 2015, Aruba, cu e mesun equipo aki ta logra e titulo maximo ganando e JDC 2015. Aruba a hunga en total 17 wega/matches di cual nan a perde solamente 1 wega/match. Cu e logro aki, Aruba ta clasifica pa representa Centro America y Caribe den e luna di mei 2015 na Merca. Eynan Aruba lo enfrenta Merca, Canada y Mexico pa un spot pa por hunga e final na Spaña den e luna di september 2015, caminda tur e paisnan di e diferente regionnan lo hunga contra di otro pa e titulo maximo.

Na mesun momento por bisa tambe cu e equipo femenino no a logra drenta e cuadro principal, pero a sa di bataya tur nan wega manera cu ta e finals nan tawata hunga. Un pabien ta bay na e equipo femenino cu a consisti di Evelyanne Kelly, Gina van der Veen, Amaryllis Lee y Henk Bouwman como nan coach.

E score di e equipo masculino contra di Costa Rica tawata como lo siguiente, Kyle Fränkel a gana 6-1/6-0 contra di Diego Chavarria, Patrick Sydow a gana 6-1/6-2 contra di Sebastian Quiros. Aruba ganando e dos partidonan individual, Costa Rica a abstene di hunga e doubles match.

ALTB ta yama na Patrick Sydow, Kyle Fränkel, Kevin Yarzagaray y nan coach Claudio Martinez un caluroso pabien pa cu e logro aki. Na mesun momento, ALTB ta expresa un palabra di gratitud na tur instancianan involvi pa cu e biahe aki di e tenistanan cu a representa Aruba dignamente. Last but not least, un pabien tambeta bay na tur e mayornan pa cu nan dedicacion y inversion den e hoben atletanan aki. Ban traha pa e proximo paso.

  Por aprecia e momento caminda e delegacion di Aruba a yega na Aeropuerto Internacional Reina Beatrix y nan a wordo ricibi calurosamente pa nan famia.  Masha Pabien na e hobennan aki cu a saca cara pa Aruba.