Den categoria femenino e fuerte equipo di Aruba Bank Lady Tigers a enfrenta Tanki Leendert Pico Bello y aki Aruba Bank a mustra nan superioridad fulminando Tanki Leendert mediante un knock out 13-0.  Aruba Bank 13 careda, 9 hit, 0 error. Tanki Leendert 0 careda, 3 hit, 1 error.  Rudlyn Ras a bay henter e ruta y a pone su promer victoria riba su nomber.  Layenne Vos a resulta pitcher perdedor ricibiendo relevo di Jeritza Ras den di 4 kende na su turno a wordo releva pa Rubia Ras den di 5 inning.

  Mihor bateadornan pa Aruba Bank Lady Tiger a resulta Meraly Kootes 2-2, Riangela Flanegin di 3-2, Mildred Tromp di 2-1 y Rudlyn Ras di 1-1 cual por cierto tabata un homerun aportando asina na su propio causa.  Pa Tanki Leendert Pico Bello a destaca na bate Jeritza y Jelitza Ras y Franzine Flanegin tur di 2-1.   

  Den e di dos wega Diadomimgo den categoria femenino Eagles a knock out Cheetah 14-2.   Gilda James a cubri henter e ruta y a resulta pitcher ganador.   Rachelle Henriquez tambe a bay completo pero mester conforma su mes cu e derota.

  Mihor bateadornan a resulta Aria James, Shardea Croes ambos di 2-1, Giandra Thiel di 1-1.  Pa Cheetah a destaca na plato Milvienne Henriquez, Rachelle Henriquez y Marietjie Kock tur di 2-1.

  Diaranson awor campeonato ta continua cu 4 wega riba dos tereno.  Na Pos Chiquito pa 7 p.m Jaguars Vitamin Water lo enfrenta Cheetah y pa 9 p.m Final Touch lo midi forza contra Madwork Blackhawks y na Kudawecha pa 7 p.m den categoria AA Pizza Hut Monster lo topa Mariners y pa 9 p.m Balashi Premium vs Macuarima Indians.

  Diabierna 19 di Juni pa 7 p.m riba veld di Kudawecha Celebrities vs Spuiters y pa 9 p.m Royal Power vs Montaña Braves.  Pues fanaticada di softball campeonato ta continua e siman aki.  Yega tereno bin apoya Bo equipo preferi.  Softball fast pitch a la carga.